I orgelkonsertane vi har publisert på nettet har vi til no høyrt barokkmusikk, folketonar, romantisk og impresjonistisk musikk. Det er no tid for ein moderne klassikar; Morton Feldman's (1926-1987) stykke "Principal Sound" (1980).
Feldman var svært interessert i tidsoppleving i musikk. I ein tekst skreiv han at medan andre sett tida i bur, slepp han det ville dyret; tida, laus. Det førte til nokre svært lange komposisjonar.
Hans andre strykekvartett er meir enn 5 timar lang. Orgelstykket "Principal Sound" varer berre i 19 minuttar, men gjev ein god smak av det dvelande uttrykket i dei lange komposisjonane.
Konserten er illustrert med bilete av interiøret i Dale kyrkje, sett igjennom eit mikroskop.
Til hausten vil vi igjen opne for publikum på konsertane, då vil vi framleis høyre eit variert program.
Vi held også fram med å publisere musikk på nettet.